படித்த ஏழைப்பெண்களுக்கு ரூ.25 ஆயிரம் உதவியுடன் தாலிக்கு 4 கிராம் தங்கம் இலவசம்

சென்னை, மே.16-

முதல்-அமைச்சராக ஜெயலலிதா பொறுப்பேற்ற பிறகு, சென்னை புனித ஜார்ஜ் கோட்டைக்கு இன்று மாலை வந்தார். பின்னர் முதல்-அமைச்சர் ஜெயலலிதா, தனது பணிகளை தொடங்கினார். அதையடுத்து நிருபர்களுக்கு பேட்டி அளித்தார். அப்போது அவர் கூறியதாவது:- முதல்-அமைச்சராக பொறுப்பேற்ற பிறகு, புனித ஜார்ஜ் கோட்டையில் உள்ள முதல்-அமைச்சர் அறைக்கு வந்து முதலில் 7 கோப்புகளில் கையெழுத்திட்டுள்ளேன். தேர்தல் அறிக்கையில் அறிவிக்கப்பட்ட வாக்குறுதிகளை நிறைவேற்றும் வகையில் முக்கியத் திட்டங்களுக்கு ஒப்புதல் அளித்து அதற்குரிய கோப்புகளில் கையெழுத்திட்டேன். படித்த ஏழைப்பெண்களுக்கு ரூ.25 ஆயிரம் உதவியுடன் தாலிக்கு 4 கிராம் தங்கம் இலவசம். பட்டம் அல்லது பட்டயம் பெற்ற பெண்களின் திருமணத்துக்கு ரூ.50 ஆயிரம் உதவியுடன் தாலிக்கு 4 கிராம் தங்கம் இலவசம். பெண்களின் ஓய்வு ஊதியம் ரூ.500-ல் இருந்து ரூ.1,000 ஆக உயர்வு. மீன்பிடி தடைகால உதவி பணம் ரூ.1,000-ல் இருந்து இரண்டாயிரம் ஆக உயர்வு. அரசு பெண் ஊழியரின் மகப்பேறு கால விடுப்பு 6 மாதமாக உயர்வு உள்பட 7 கோப்புகளில் கையெழுத்திட்டுள்ளேன் என்று முதல்-அமைச்சர் ஜெயலலிதா கூறினார்.